Inspektorati Policor i Kosovës ka realizuar një hulumtim për të monitoruar nivelin e besueshmërisë së publikut në Policinë dhe shërbimet e saj.

Mbi 73% e qytetarëve të Kosovës vlerësojnë profesionale sjelljen  dhe qasjen policore në rrugë. Kjo është bërë e ditur nga një hulumtim që ka kryer Inspektorati Policor i Kosovës.

Sipas hulumtimit  15.3% e të anketuarve tjerë e konsiderojnë si jo profesionale dhe 10.9 % të tjerë që nuk kanë dhënë përgjigje.

47% e të anketuarve në nivel vendi pajtohen me qëndrimin se Policia përdor forcë të kontrolluar fizike, të arsyeshme, të domosdoshme dhe proporcionale, kundrejt 29.9% të anketuarve tjerë që nuk pajtohen me këtë qëndrim.

Sipas këtij hulumtimi 56.8% e të anketuarve në nivel vendi janë deklaruar përmes anketës së Policia I trajton të gjithë njëjëson pa marrë parasysh gjininë, moshën, etninë dhe religjionin, kundrejt 28.7% të anketuarve që e kundërshtojnë këtë qëndrim.

34.1% e të anketuarve në nivel vendi mendojnë se policia punon shumë në parandalimin e veprimeve kriminale , kundrejt 59,2% e të anketuarve që mendojnë se punohet pak.

55.6% e të anketuarve në nivel vendi I rendisin vjedhjet si shqetësim kryesor dhe më serioz të sigurisë në komunitetin e tyre , pasuar nga drogat me 14.9%, trafiku me 12.5% prishja e rendit dhe qetësisë publike me 10.9% si dhe shqetësimet e tjera.

Hulumtimi është realizuar me anketë, përmes të cilës janë mbledhur të dhëna sistematike mbi fushat me interes. IPK ka nxjerrë perceptime të opinionit mbi fushat, si: policimi në bashkësi, përdorimi i forcës, trajtimi i qytetarëve, bashkëpunimi i ndërsjellë, shqetësimet mbi krimin, metodat e policimit, besueshmërinë, kënaqshmërinë, etj.

Hulumtimi është realizuar në të gjitha komunat dhe mostra e paracaktuar ka përfshirë një numër të anketuarve prej 1.782 qytetarëve. Mostra ka qenë proporcionale dhe është përdorur për secilën komunë, duke u bazuar në numrin e banorëve sipas komunave. Pyetësorët janë plotësuar në të gjitha qytetet dhe një numër të konsideruar fshatrash.

Rezultatet e këtij hulumtimi mund t’i gjeni në këtë link